My SCRAPBOOK (సేకరణలు): A COLLECTION of articles in English and Telugu(తెలుగు), from various sources, on varied subjects. I do not claim credit for any of the contents of these postings as my own.A student's declaration made at the end of his answer paper, holds good to the articles here too:"I hereby declare that the answers written above are true to the best of my friend's knowledge and I claim no responsibility whatsoever of the correctness of the answers."

Sunday, October 07, 2007

శృంగార ఘటికులు

నవరసాల్లో శృంగారానిదే అగ్రస్థానం. సృష్టికి మూలం శృంగారమే. ఒకప్పటి కవులు శృంగారమే ప్రధానంగా కావ్యాలు రాసేవారు. శృంగార శాకుంతలం, శృంగార నైషధం- అంటూ గ్రంథనామాల్లో సైతం హుషారును జోడించేవారు. అటువంటి కావ్యాలను అంకితం పుచ్చుకోవాలని అప్పటి ప్రభువులూ ముచ్చటపడేవారు. ప్రజలూ ఆసక్తిగా చదివేవారు. శృంగార వర్ణనలు లేని కావ్యాలు ఉప్పులేని పప్పులా చప్పగా ఉంటాయని నిరసించటమూ జరిగేది. ఈ వైనాలన్నీ తెలిసినవాడు కాబట్టే కవి చౌడప్ప, ''పది నీతులు పది బూతులు పది శృంగారములు గల్గు పద్యములు సభం జదివినవాడే యధికుడు గదరప్పా...'' అని ఏ సంకోచం లేకుండా ఖండితంగా చెప్పేశాడు. దైనందిన జీవితంలో వరసైనవాళ్ళ సరససల్లాపాల్లో శృంగారం తొణికిసలాడుతూనే ఉంటుంది. అసభ్యతకు తావులేని శృంగారమే ఆస్వాదయోగ్యమైనప్పటికీ వర్ణనల్లో శృంగారం శ్రుతిమించటం మామూలే. ''మకరధ్వజుని కొంప నొక చెంప కనిపింప చీరకట్టినదయా చిగురుబోడి'' వంటి పద్యాలు ఆ కోవలోకే వస్తాయి. అటువంటి పద్యాలవల్లే శ్రీనాథుడు శృంగార శ్రీనాథుడుగా ప్రసిద్ధికెక్కాడు! ఎందరో హాజరైన ఆ పార్టీ రంజుగా సాగుతోంది. అర్ధరాత్రి దాటింది. ప్రఖ్యాత శాస్త్రవేత్త ఆల్బర్ట్‌ ఐన్‌స్టీన్‌తో పాటు పార్టీలో పాల్గొంటున్న ఓ అందమైన యువతి కిటికీ దగ్గరకు వెళ్ళి ఆకాశంలోకి చూస్తూ, ''చూశారా వీనస్‌ నక్షత్రాన్ని. ధగధగా ఎలా మెరుస్తోందో... అందుకే వీనస్‌ను అందాలకు అధిదేవత అంటారు'' అంది. ''అది వీనస్‌ కాదు. జూపిటర్‌'' అన్నాడు ఐన్‌స్టీన్‌. అందుకా యువతి చప్పట్లు చరుస్తూ ''మీరు నిజంగా చాలా గొప్పవారండీ... ఇంత దూరాన్నుంచి చూస్తూ కూడా నక్షత్రాల సెక్సును సైతం కరెక్టుగా కనిపెట్టేస్తున్నారు'' అంది.

ప్రపంచంలోని ఎన్నో భాషల్లో శృంగారమే ప్రముఖ స్థానం వహిస్తోంది. బాల్జాక్‌ రాసిన శృంగారపూరితమైన కథలు డి.హెచ్‌. లారెన్సు, చలం వంటి వారు రాసిన నవలలు ఈనాటికీ ప్రజాదరణ పొందుతున్నాయి. శృంగార సంబంధ సామెతలు అనేకం తెలుగులో ప్రచారంలో ఉన్నాయి.
బావా అని పలకరిస్తే రావా అని కొంగు పట్టుకున్నాడట, మోహభ్రమను చిక్కి మొనగాడు నీల్గడా, యోగికీ రోగికీ భోగికీ నిద్ర ఉండదు, బ్రమసి బాపనయ్య దగ్గరకు పోతే వద్దేబాబూ వర్జ్యం ఉందన్నాడట వంటి సామెతలు అడపాదడపా వినపడుతూనే ఉంటాయి. ఆ అమ్మడు తన ప్రియుడికి టెలిగ్రాం ఇవ్వటానికి పోస్టాఫీసుకు వచ్చింది. ''సరే...'' అని ఒక్క ముక్కరాసి కౌంటర్‌లో ఉన్న బాబుకు ఇచ్చింది. ఆ కాగితం చూసిన కౌంటర్‌బాబు ''మరో మూడు నాలుగు మాటలు రాసినా అంతే చార్జి అవుతుందమ్మా!'' అన్నాడు. ''అవుననుకోండి... సరే సరే అని మూడుసార్లో నాలుగు సార్లో రాస్తే నేను మరీ తొందర పడిపోతున్నానని నా బాయ్‌ ఫ్రెండు అనుకోడూ...'' అందా అమ్మాయి కొంచెం సిగ్గుపడుతూ. ప్రేమ, శృంగారాల ప్రకటనల దగ్గరకొచ్చేసరికి కొన్ని అప్రకటిత హద్దులూ ఉంటాయి.

ఈ కబురు వింటే తన పాత డైలాగును మార్చి ''మన వాళ్ళు గొప్ప ఘటికులోయ్‌'' అని ఉండేవాడు గిరీశం పంతులు. 26 దేశాల్లో సాగించిన ఇటీవలి అధ్యయన ఫలితాల ప్రకారం
వాత్సాయన కామసూత్రాలకు పుట్టినిల్లయిన భారతదేశ వాసులే భేషయిన శృంగార జీవితాన్ని అనుభవిస్తున్నారు. రకరకాల భంగిమల్లో శృంగారంలో పాల్గొంటూ సంతృప్తికర ఆనందానుభూతి పొందుతున్నారు. సర్వేలో పాల్గొన్న పదిమంది భారతీయుల్లో ఏడుగురు తాము శృంగారంలో పరిపూర్ణ ఆనందాన్ని అనుభవిస్తున్నామని స్వర్గసుఖాలను రుచి చూస్తున్నామని చెప్పారు. ప్రేమికుల దేశంగా పేరుపొందిన ఫ్రాన్సు వంటి దేశాలు ఈ విషయంలో వెనకబడిపోయాయి. సర్వేలో పాల్గొన్న భారతీయుల్లో 68శాతం తాము చక్కని శృంగార జీవితాన్ని అనుభవిస్తున్నామంటే బ్రిటన్‌లో 38శాతం, ఫ్రాన్సులో 36శాతం మాత్రమే ఆ విధంగా చెప్పగలిగారు. గ్రీకులు మెక్సికన్లు మాత్రం తమ శృంగార జీవితం సంతృప్తికరంగానే ఉన్నట్లు వెల్లడించారు. పడక గదిలో తమకు ఏం కావాలో సహచరులు, ఎలా సహకరించాలో చెప్పడంలో 74శాతం భారతీయులు ఎటువంటి బిడియాన్నీ కనబరచటం లేదు. ప్రపంచంలో సగటున 58శాతం మాత్రమే అలా నిస్సంకోచంగా చెప్పి పడకగదిలో సుఖాలను పొందగలుగుతున్నారు. ప్రియులు ప్రియురాళ్ళ విషయంలో భారతీయులది సంయమన మార్గం. భారతీయ పురుషులకు సగటున ఆరుగురు ప్రియురాళ్ళు ఉండగా, మహిళలకు ఇద్దరు ప్రియులు ఉంటున్నారు. అదే బ్రిటన్‌లో పురుషులకు 16మంది ప్రియురాళ్ళు, మహిళలకు 10మంది ప్రియులు ఉంటున్నట్లు సర్వేలో తేలింది. భారతీయులు పడకగదులను అలంకరించుకోవటంలోను ప్రత్యేక శ్రద్ధను కనబరుస్తారు. ఇటీవలి కాలంలో కామోద్దీపనను కలగజేసే కృత్రిమ పరికరాలను ఉపయోగించటమూ ఎక్కువైనట్లు తేలింది. శృంగారాన్ని సర్వతోముఖంగా అనుభవించి ఆనందించటానికి ప్రపంచంలోని మిగతా దేశాల వారికంటె భారతీయులే ముందున్నారని సర్వేలో తేలిపోయింది. ''ఆనందం అర్ణవమైతే అనురాగం అంబరమైతే, అనురాగపుటంచులు చూస్తాం, ఆనందపు లోతులు తీస్తాం'' అని మహాకవి అననే అన్నారు కదా!
(Eenadu, 07:10:2007)
__________________________________

Labels:

0 Comments:

Post a Comment

<< Home