రామానాయుడుకి వెంకయ్య పురస్కారం

హైదరాబాద్‌, న్యూస్‌టుడే:
శతాధిక చిత్రాలను నిర్మించిన డి.రామానాయుడుని 2006 సంవత్సరానికిగాను రఘుపతి వెంకయ్య పురస్కారం వరించింది. గుమ్మడి వెంకటేశ్వరరావు, పి.సాంబశివరావు, కె.సి.శేఖర్‌బాబులతో కూడిన త్రిసభ్య కమిటీ సోమవారం పురస్కారాన్ని ప్రకటించింది. ఈ అవార్డును ఏప్రిల్‌లో నిర్వహించే నంది అవార్డుల ప్రదానోత్సవంలో అందిస్తారు. 1936 జూన్‌ 6న ప్రకాశం జిల్లా కారంచేడు గ్రామంలో జన్మించిన రామానాయుడు 'రాముడు-భీముడు' చిత్రంతో సినీరంగ ప్రవేశం చేశారు. నిర్మాతగా, స్టూడియో యజమానిగా, ల్యాబ్‌లకు అధిపతిగా, పంపిణీదారుగా పరిశ్రమలకు సేవలను అందించారు. తెలుగుతోపాటు హిందీ, తమిళం, కన్నడం, ఒరియా, మరాఠీ, బెంగాలీ, ఆంగ్ల భాషల్లో చిత్రాలను నిర్మించినందుకుగానూ గిన్నిస్‌ బుక్‌ ఆఫ్‌ వరల్డ్‌ రికార్డులో ఆయన పేరు నమోదైంది.
(Eenadu, 01:04:2008)
=========================